Iarscoláire Ollscoil na Banríona ag teagasc na Gaeilge i Meiriceá
Beidh iarscolaire de chuid Ollscoil na Banríona ag triall ar na Stáit Aontaithe ag deireadh mhí Lúnasa le bliain a chaitheamh ag teagasc na Gaeilge. Bhain Caitlin Ní Earcáin, arb as Cathair Dhoire ó dhúchas í, céim sa Ghaeilge amach ó Ollscoil na Banríona in 2021 agus Teastas Iarchéime san Oideachas sna Nuatheangacha in 2022. Tá sí ag obair mar mhúinteoir in earnail an Ghaeloideachais le ceithre bliana anuas. Tá an clár Fulbright ar bun ó bhí 1957 ann, agus tá sé á bhainistiú ag Coimisiúin na hÉireann-Stáit Aontaithe um Mhalartú Oideachais. Urraíonn an Roinn Forbartha Tuaithe agus Pobail agus Gaeltachta na Cúntóirí Teagaisc Teangacha Iasachta Fulbright (FLTAnna). Beidh ceathrar eile in éineacht le Caitlin ag dul chuig coláistí éagsúla ar fud na Stát Aontaithe, áiteanna andéanfaidh siad féiniúlacht agus cultúr na hÉireann a roinnt sna Stáit Aontaithe. Tá Caitlin ag dúil go mór leis an eispéireas teagaisc sna Stáit Aontaithe, mar rud a bhí ar intinn aici ó bhí sí ina scolaire Gaeilge in Ollscoil na Banríona. “Is cuimhin liom nuair a bhí muid in Ollscoil na Banríona, agus luaigh mo léachtóir, Marcas Mac Coinnigh, an scéim Fulbright agus tá mé ag iarraidh á dhéanamh ó shin. “Tá mé ag dúil go mór leis agus tá mé ar bís go bhfuil mé á dhéanamh faoi dheireadh.” Beidh Caitlin ag obair mar theagascóir Gaeilge in The College of Our Lady of the Elms, Chicopee, Massachusetts, agus beidh sí congarach do chathair a bhfuil dlúthnasc ag na hÉireannaigh leis. “Is coláiste beag Caitliceach é. Tá thart ar dhá mhíle scolaire ann mar sin is coláiste measartha beag atá ann. Beidh seans agam aithne mhaith a chur ar dhaoine. “Boston an chathair is mó atá congarach don choláiste. Tá sé thart fá dhá uair a chloig ar shiúl ar an bhus. Ní hamháin go bhfuil sé mar sprioc ag an scéim Fulbright go gcuireann a gcuid teagascóirí le saol na hollscoile, ach ní mór daofa cur le pobal na háite a mbíonn siad chomh maith. “Tá bunrang Gaeilge le teagasc agam d’fhoghlaimeoirí san ollscoil, agus beidh mé ag teagasc leis an Cultural Centre of Western New England. Beidh ‘advanced beginners’ le teagasc agam ansin, chomh maith le daoine atá ag foghlaim na Gaeilge le tamall fada anuas. “Beidh mé ag teagasc ranganna ceoil ar an fhéadóg stáin chomh maith, agus beidh mé ag iarraidh cur leis an fhoireann peil Ghaelach atá acu cheana féin.” Beidh deiseanna staidéir aici féin chomh maith, mar a bheas sí ag tabhairt faoi rang ar na Luathlaethanta Mheiriceá, agus rang eile ar an oideachas. Agus cad é an rud is mó a bhfuil sí ag dúil leis? “Níor bhog mé ar shiúl ón bhaile riamh. Bhí mé i nDoire, i mBéal Feirste, agus anois tá mé ar ais i nDoire. Mar sin tá mé ag dúil go mór leis an deis seo a thapú agus a bheith ag taisteal agus ag bualadh le daoine úra, cultúr nua a bhlaiseadh agus cultúr agus teanga s’againne a chur chun cinn chomh maith. Foclóir:Teagascóir – tutorMúinteoir – teacherColáiste – collegeFéadóg Stáin – tin whistleTaisteal – travelCeathrar – four people
